– كلمات قصيدة حمزة هشام الجخ
وحّد إلهك ..
واترمي في كنفه وجنابه ..
واشكره ..
وامّا تيجي تشكره .. أشكره ..
إنه علّم حد فينا يعلمك .. إزاي بقلبك تذكره .. وتشكره ..
وحّد إلهك ..
واترمي في كنفه وجنابه ..
ما تفارقش في يوم عتابه ..
واسعي سعيك .. احبي حبيك ..
وامشي مشيك .. واجري جريك ..
مهما تقلت المعاصي .. اوعى تيأس ..
ربنا نش ريّه زيّك .. ربنا بس اللي ما بيقفلش بابه ..
فاحتمي في كنفه وجنابه ..
واحفظ السكة اللي ترجع منها ليه ..
إن عصيت .. وأكيد حتعصى .. استحي وارجع ناديه ..
اللي دخلوا الجنة يا ابني مش ملائكة .. اللي دخلوا الجنة كانوا زي أبوك ..
شنقوا من كثر المعاصي .. بس تابوا ..
وانت حظك .. إن ربك رحمته سبقت عذابه ..
فاترمي في كنفه وجنابه ..
عينك على أمك ..
مهما كان حجم انشغالك ..
اوعي تكبر وأنت مش واخد بالك ..
اوعي تعرج .. ولا تتقل ودنها ومتاخدش بالك ..
اوعي يلهيك عنها حالك ..
عايز امّا أموت ..
يفضل لي كف وعين وصوت ..
وكتف تتسند عليه متكلفتة ..
ونفس يدفي في فرشها في برد الشتا ..
وقلب مطمن بإني مشيت وسبتها لك ..
فاوعي يلهيك عنها حالك ..
طول حياتها .. شيلها في عنيك وفي وريدك ..
حج بيتها كل يوم .. بيتها ريدك ..
في المدافن وانتو جايين حابقي في العين اللي جنبك ..
حابقي شايف ..
عايز أشوفك وأنت بتنزلها بيدك ..
وأنت صاين لحمها لحد الممات ..
سيبها تتباهى بآخر لمسة منك لما تنزل وسط باقي الأمهات ..
حتقول ده ولدي .. صلب أبوه ..
حبته للشيلة الأخيرة .. وسبته إخواته البنات ..
أوعى تطلع واد جبان ..
اجري خلف الموت يخافك ..
موت فدا البلد اللي ربت لك كتافك ..
اوعى تنكر خيرها زي الخوانين ..
الطماعين اللحاسين الكذابين ..
اوعي لينسوك يا ولدي أنت مين ..
وابن مين ..
اوعي ما تفرقش بين العفيانين والورمانين ..
اقرا من كتب الشمال ..
اقرا من كتب اليمين ..
اقرا لصحاب البلاط ..
واقرا أدب المسجونين ..
شوف حكومات السياط ..
واقرا سيرة الراشدين ..
أوعى لينسوك يا ولدي .. مصر مين ..
أوعي تركن للكلام اللي يوماتي بنسمعه من الرغايين ..
مصر خوفو .. مصر خفرع .. الحضارة .. السنين ..
لا يا ولدي .. مصر أنت .. مصر شغل وناس بتعرق ..
مصر جيش من غيره نغرق ..
مصر حواليها العِدا متربصين ..
اوعى تنضم لعشيرة البياعين ..
حتي لو تهموك يا ولدي زي أبوك وقالوا كافر ..
قل لهم أنا ديني ربي .. وبعده منه .. مصر دين ..
آخر وصية ..
لما تكبر حتلاقينا في التاريخ ..
باب صغير .. حيداوره .. مكتوب عليه ( شباب ثاير ) ..
مش بعيدة يعلموك في المدراس وقتها إن اسمها نكسة يناير ..
قل لجيلك .. إنها ماكانتش نكسة ..
وانتا جيل البداية وانتو دوركم جاي لسة ..
وافرد كتافك واحكي عن جيلي الفتو ..
عايز الناس لما تسمع نبرتك في الميكروفون يقولوا ( هو )
اللي خلف لسة عايش ..
لسة صوته ونبرته فيها الوجع ..
لسة واقف ضد ظلم الجبارين ..وقفة جدع ..
آخر وصية وآخر ونصيحة ..
آخر وصية ..
سبت لك ورثك براح .. تسقي كرمه يزيد ويكرم ..
سبت لك ستر وجناح .. عقل يفهم .. قلب يرحم ..
سبت لك حب الغلابة .. ناس كتيرة .. جيش عرمرم ..
وان جم يقايضوك بالفلوس .. ويقعدوك وسط الكبار .. ويسكتوك ..
قل لهم أنا زي أبويا ..
لا عمره كل فضلة موايد .. ولا عمره رمرم ..
سبت لك حب الغلابة .. أغلى من كل الذهب .. وأكتر .. وأعظم .
