– ركعتين الفجر
مع ركعتين الفَجر
القلب بيدندن
يِعْلا الأدان جواي.. من قبل ما يأذّن
يا (بلال) يا صوت السما
يا أبو التجارة رَبَاح
شرفك يطول السما
واسمك (بلال) يا (رَبَاح)
خلي النبي يرتاح..
قيم الصلاة وأذّن
مع ركعتين الفَجر..
القلب بيدندن
– مش كفاية
طيّاراتكم مش كفاية
والمدافع مش كفاية
والقنابل والحصارْ
والحرايق والدمارْ
والدموع فى عيون صغارْ
والجناين تبقى نارْ
مش كفاية!
*
لو عايْزِينّي مرة أخضع.. غيّروني
شوفوا يمكن لو ده ينفع.. بدّلوني
ولما ما تلاقوليش طريقة
واجهوا – لو مرّة – الحقيقة
واقروا من قرآني آية
تفهموا أصل الحكاية
إنى باضحك ع القنابِلْ
موتة جاية وقلبي قابِلْ
تعرفوا إنّ القنابِلْ
والمدافع والشظايا
والسلاح اللى معاكو ومش معايا
مش كفاية!
*
موّتونى ألف مرّة.. مش كفاية!
غصب عنكو بلادي حرة.. وللنهاية
كلمة باكتبها بدمايا للي يستشهد ورايا
إن تمن الجنة دِيَّه
لو حياتك.. مش كفاية
– ملك النحل
على مشهد اللي افترَقْ
يِبكِي العَرَقْ وينُوحْ
إيَّاك تخافي الغَرَقْ
قلبي سفينة نوحْ
لا تغُرِّك المتاهات..
ولا صَهْد أيَّامِكْ
عُمْر اللي سقَّى ما ماتْ
وآهو زرْعُه قدامِكْ
شُوبش يا الْخَطَّافِينْ
خبِّيتوا الخِطَّة فين؟
وبيِبْنُوا قلوعِكْ من جوعِكْ
وبيرْمُولْنا الخُطَّافِينْ
يا ريتني كنت ملِك النَّحلْ..
أقول الحقّ مرّة.. وأموتْ
عينيكِ فدّانين من نَخْلْ
ومن مِيتَى النّخِل بيموتْ؟
والبت عروسة بكَارْ
زفُّوها بضرْب النَّارْ
حواليها خَدَمْ وِوْلادْ
فارْشين وَرْد وسِجَّادْ
واخْدينْهَا بالخِنَاقَة
والمَهْر أَلْف نَاقَة
والنِّيل اِعْوَجّ ولَفّ
ويا وِيل الزّرع إنْ جَفّ
صوتَكْ هَجَّة مهجَّة
والشَّاطِر يِتْهجَّى
فِيض يا نِيل في جنادِلْ
ما تصُبِّش في الجرادِلْ
ده البِتّ عروسة بكَارْ
خَطَفُوها بضرْب النَّارْ
