كلمات قصيدة مكنتش هناك هشام الجخ
ماكنتِش في شلّة صحابك ساعتها
ماشفتِش دموعك وكسْرِةْ جناحَكْ
ولمّا الحبيب الوحيد استباحَكْ
ماكنتِش معاكْ
ماكنتِش فى وقت انبساطَكْ..
بساطَكْ
ماكنتِش في وقت اندفاعَكْ..
دفاعَكْ
ولمّا عرِفْتْ السهاد والسهَرْ
وأوّل ليلة تناجي القمَرْ
وغامت عليك السّما والليالي
سامحْني يا غالي.. ماكنتِش سماكْ
في أوّل “باحبَّك”.. ماكنتِش معاكْ
وأوّل “واحشني”.. ماكنتِش معاكْ
فاتتني الحاجات المهمّة ف حياتَكْ
ولمّا دموعَك بتحكي اللي فاتَكْ
باحسّ إنّي عاجز أفسّر بُكاكْ
يمكن لأنّي.. ماكنتِش هناكْ
